About the hospital

आस्था किड्नी एण्ड स्पेसलाइज्ड हस्पिटल स्पष्ट उद्देश्य, सेवाभाव र बिरामीप्रतिको जिम्मेवारीका साथ स्थापना भएको स्वास्थ्य संस्था हो। विशेषगरी उपचारका लागि भौंतारिरहेका तथा आर्थिक र स्वास्थ्य दुवै दृष्टिले कठिन अवस्थामा रहेका बिरामीहरूलाई सहज, गुणस्तरीय, विशेषज्ञ र भरपर्दो स्वास्थ्य सेवा उपलब्ध गराउने हाम्रो मुख्य उद्देश्य हो।

सन् २०१७ तिर म पोखरामा नेफ्रोलोजिस्टका रूपमा आएँ। त्यस समयमा पोखरा तथा आसपासका क्षेत्रमा विशेषगरी मिर्गौलासम्बन्धी रोगका बिरामीहरूले विशेषज्ञ सेवा प्राप्त गर्न कठिनाइ भोगिरहेको अवस्था थियो। यही आवश्यकता र समर्पित विशेषज्ञ सेवा प्रदान गर्ने उद्देश्यले सन् २०१८ मा पोखराको न्युरोडमा किड्नी–लिभर क्लिनिक स्थापना गरियो।

समयसँगै क्लिनिकमा सामान्य उपचारदेखि गम्भीर अवस्थाका, डायलाइसिस आवश्यक पर्ने मिर्गौला तथा कलेजोका बिरामीहरूको संख्या बढ्दै गयो। यसबाट विशेषज्ञ परामर्श, भर्ना, डायलाइसिस, आकस्मिक उपचार लगायतका सेवाहरू एउटै स्थानबाट उपलब्ध गराउन सक्ने समर्पित अस्पतालको आवश्यकता महसुस भयो।

यही सोचका साथ सन् २०२० तिर ‘आस्था किड्नी हस्पिटल’ स्थापना गर्ने प्रक्रिया अघि बढाइयो। यस यात्रामा सुरुदेखि नै श्री अर्जुन कार्कीको निरन्तर साथ, सहयोग र महत्वपूर्ण योगदान रह्यो। पछि अन्य शेयरधनी तथा विभिन्न विधाका विशेषज्ञ चिकित्सकहरू पनि यस अभियानमा जोडिँदै गए।

अस्पतालको उद्देश्य मिर्गौला उपचारमा मात्र सीमित नराखी विभिन्न विशेषज्ञ सेवा एउटै छानामुनि उपलब्ध गराउने भएकाले ‘आस्था किड्नी हस्पिटल’ लाई ‘आस्था किड्नी एण्ड स्पेसलाइज्ड हस्पिटल’ नामकरण गरियो। हाल पोखराको रानीपौवास्थित अस्पतालबाट मिर्गौला तथा कलेजो लगायत मुटु, अर्थोपेडिक्स, ईएनटी, स्त्री तथा प्रसूति, शल्यचिकित्सा लगायत विभिन्न विधाका विशेषज्ञ सेवाहरू उपलब्ध भइरहेका छन्।

हाल २५ शय्याबाट सेवा सञ्चालन गरिरहेको अस्पताललाई आगामी दिनमा १०० शय्याको सुविधासम्पन्न अस्पतालका रूपमा विकास गर्ने हाम्रो दीर्घकालीन लक्ष्य रहेको छ। साथै, मिर्गौला प्रत्यारोपण सेवालाई नियमित र व्यवस्थित रूपमा सञ्चालन गर्ने हाम्रो महत्वपूर्ण उद्देश्य हो।

बिरामीहरूबाट प्राप्त सकारात्मक प्रतिक्रिया र सुझावहरूले हामीलाई अझ राम्रो सेवा प्रदान गर्न प्रेरित गरिरहेका छन्। हाम्रो विश्वास छ, अस्पतालको प्रगति केवल भौतिक पूर्वाधार विस्तारमा होइन, प्रत्येक बिरामीलाई सहज, गुणस्तरीय, विशेषज्ञ र भरपर्दो स्वास्थ्य सेवा प्रदान गर्नमा निहित छ।

यही उद्देश्य, सहकार्य र प्रतिबद्धताका साथ आस्था किड्नी एण्ड स्पेसलाइज्ड हस्पिटल पोखरा तथा आसपासका जनसमुदायको विश्वासिलो स्वास्थ्य सेवाको केन्द्रका रूपमा निरन्तर अघि बढ्ने प्रतिबद्धता व्यक्त गर्दछौँ।